فين المطر
بقلم الشاعر: صلاح رزق
حبة مشاعر منلخبطه
من كتر ما شافت سواد
ماشيه على. عكاز خشب
والضهر محنى والشعر شاب
واقفه تبص عل البشر
شباك أمل دابت عيونه م البكا
يسأل عن الفجر اللى تاه
وسط القلوب المظلمه
متعتمه وكأنها م الظلم
أنشف م الحجر
والذكريات متبعتره
مافضلش منها غير العيون الدبلانين
من كتر ما نزفت دموع
وللتراب استسلمت
النبص باقي بس الجسد من غير ملامح
ايد ترتعش ع الدرج اللي مليان بالصور
مش عاوزه حتى تفتكر إنسان رحل
سافر يدور عل الأمل
او حتى لقمه وغربته
عن كل حاجه بحبها
هي التمن
ليه يا زمن؟ فيك العِبر
قلبى من القسوة انفطر
وكتبت ليك يجي ميت قصيدة محوجه
من جرح سمَّع فى الضلوع
حتى الحلا حبة دموع
يمكن ترد اللي انكسر
من حقى اعرف ايه حصل؟
والدنيا ليه مستقصده كل البشر؟
وف حضنها كبشة وحوش ما بيشبعوش
ولا حتى بيخافوا القدر
فين المطر ؟
فين ودتوه يا غجر ؟
حتى الغيطان إتسممت
من كتر ما شافت جشع
القمح يبكى عل الولد
اللي أتوأد يوم ما اتولد
يحلف بأنه مش طرف
ليه تظلموه
انتوا اللي بأديكو اتخنق
حتى اسألوا كل الشجر
كل الزروع الطيبه متألمه
كل الطيور تبكي وهي فى السما
بتلف على خير إنسرق
فرعون خلاص
مات واندفن من غير كفن
لجل البشر ما تشوف حقيقته فى القمر
كانت نهايته بالعصا
لما عصى
بكل جبروته انكسر
من حقى اعرف ايه حصل؟
والدنيا ليه مستقصده كل البشر
والذكريات متلصمه
واقفه على
شباك أمل
مستنظره الفجر اللى تاه
تبعت رسايل للقمر
وفى حلجها نفس السؤال
فين المطر؟
فين ودتوه يا غجر٠
قصيدة فين المطر كلمات صلاح رزق
ليست هناك تعليقات:
إرسال تعليق