الغربة
بقلم الشاعر : الدكتور علي مسلم عجمي
الفقر جوات الوطن غربة كبيره
تعاسة و شقا و مواجع كتيره
فقير و ما إلو تا ينام موقع
لحافو الهوا و فراشو حصيره
و جارو غني و ظالم ما بيشفع
و متل حكايتو عالم غفيره
بيضطر الفقير السفر يجمع
مال و غلتو تطلع وفيره
و بالغربة إذا أموال طَلَّـع
اغتنى و أسس حَوِل مِنو عشيره
بيخلق وطن بالغربة و أوسع
و أمتع من وطن عاشو بِحِيره
خبز الوطن مهما يكون قاسي
الغربة و كعكها أكثر مآسي
الغربة متل مبنى هش بدو
إذا بيوقع شو بيسبب مآسي
حبلك قد ما بتقدر تمدو
الغربة بتقطعو و فيها انتكاسي
مهما الوطن قاسي يكون حدو
الغربة حدها ما لو وَناسي
فقرك بالوطن لو زاد حدو
بيبقى أهون تسافر وغربة
تزيدك هم و تزيدك شراسي
أنا مسافر ما بدي تودعيني
حتى تذوبي جمرة حنيني
بوطنا صارت العيشة فظيعة
فقر و غلا ما عادت أمينة
الفقر بالوطن غربة شنيعة
و جسد بالذل للتاجر رهينة
ما فيي عيشتي تبقى وضيعة
غريب بضيعتي أو بالمدينة
مسافر انا بهالدنيا الوسيعة
الغربة ممكن تعدِّل سنيني
و برجع عالوطن بعد القطيعة
و بإيدي حامل الدرة الثمينة
الشاعر د. علي مسلم عجمي . لبنان
ليست هناك تعليقات:
إرسال تعليق