كيف الرجعة ليك
بقلم الشاعرة : صفاء عبدالله حسين - السودان
كان لي مراد أرحل أفوت بلداً بعيد
كان أستعيد رقصات قلب اصلاً هو مات
قول لي يا زولي القبيل كيفن أعِيد
صوت الفرح جُواي من قبل الفوات
أو كيف اغالب لي وجع سكن الوريد
أو كيف أرمم لجراحي في لحظات شتات
أنا قولت ليك قلبي الزمان غيرتوا بي قلباً جديد
قول لي كيف الرجعة ليك وكيف أعيد الذكريات
قول لي هي كيف العُشرة هانت يا وحيد
قسماً بمن خلق الفؤاد وزانه بالخفقات
والله من قبل الوجع أنا كُنت مسرور بيك شديد
لكن خلاص في حضرتك عدلت بعض المُجريات
ما يا هو قلبي صِبح بلاك طيب أكيد
أو كيف أعدل مُجريات زمناً هو كان عديتو فات
والله من بعدك صبح اليوم هاني وسعيد
يا ربي حرر روحي من هم الليالي المُثقلات
بقلم .صفاء عبدالله حسين - السودان
بتاريخ / 10 / 2 / 2026م
ليست هناك تعليقات:
إرسال تعليق